СОДИРОТИ 45 ТОННА ЧОРМАҒЗ БА ХОРИҶИ КИШВАР

Душанбе, 23 апрел. (АМИТ «Ховар, Покиза Маҳмадбекова). – «Дар давоми семоҳаи якуми соли 2010 ташкилоту корхонаҳо ва хоҷагиҳои Иттифоқи «Тоҷикматлубот» зиёда аз 3,7 миллион сомонӣ фоида ба даст оварданд, ки назар ба ҳамин давраи соли гузашта 977 ҳазор сомонӣ зиёд аст»-гуфт зимни нишасти матбуотӣ 23 апрел, раиси Иттифоқи «Тоҷикматлубот» Сироҷиддин Валиев. Ӯ ҳамчунин қайд намуд, ки ҳаҷми муомилоти чаканаи мол ба 28,7 миллион сомонӣ, аз ҷумла моумилоти моли муассисаҳои хӯроки умумӣ ба 6,1 миллион сомонӣ расид,  ки нисбати семоҳаи аввали соли 2009-ум 1,1 миллион сомонӣ зиёд мебошад. Дар ин давра аз беруни марзи ҷумҳурӣ ба маблағи 355 ҳазор сомонӣ молу маҳсулот ворид карда шуд. Ба хориҷи кишвар бошад, дар ин давра 721 тонна сабзавот, 85 тонна меваи хушк, 241 тонна лӯбиёгӣ ва 45 тонна чормағз содир гардид. Ба воситаи ярмаркаҳои фурӯши маҳсулоти кишоварзӣ зиёда аз 72,6 тонна маҳсулот ба сокинони пойтахт ба фурӯш бароварда шуда, ба аҳолии ҷумҳурӣ 4849,6 тонна ангиштсанг пешкаш гардид.