ҲАМКОРИҲО ГУСТАРИШ МЕЁБАНД

Душанбе, 20 май. (АМИТ «Ховар», Покиза Маҳмадбекова). — 19 майи соли 2010 дар ҳошияи ҷаласаи 37-уми Шўрои вазирони корҳои хориҷии кишварҳои аъзои Созмони Конфронси Исломӣ мулоқоти Вазири корҳои хориҷии Ҷумҳурии Тоҷикистон, Раиси ҷаласаи 37-уми Шўрои вазирони корҳои хориҷии кишварҳои аъзои Созмони Конфронси Исломӣ Ҳамрохон Зарифӣ бо Дабири кулли Созмони Ҳамкории Иқтисодӣ Яҳё Маъруфӣ баргузор гардид. Тавре ба мухбири АМИТ «Ховар» аз Вазорати корҳои хориҷӣ иттилоъ доданд, дар рафти сӯҳбат Дабири кулли Созмони Ҳамкории Иқтисодӣ ҷониби Тоҷикистонро ба муносибати доир намудани ҷаласаи 37-уми Шўрои вазирони корҳои хориҷии кишварҳои аъзои Созмони Конфронси Исломӣ ва раёсат дар ин созмон табрик гуфт. Сипас Ҳамрохон Зарифӣ ва Яҳё Маъруфӣ роҷеъ ба масъалаҳои ҳамкориҳо миёни Созмони Конфронси Исломӣ ва Созмони Ҳамкории Иқтисодӣ табодули назар карданд. Мавзўи дигари сўҳбат ҳамкориҳои Тоҷикистон бо Созмони Ҳамкории Иқтисодӣ буд, ҳангоми муҳокимаи он ҷонибҳо роҷеъ ба рушди ҳамкориҳои иқтисодӣ дар қаламрави созмон ва амалӣ кардани тарҳҳои алоҳида ба мақсади боз ҳам густариш бахшидани ҳамкориҳо табодули назар намуданд.