ҶАШНВОРАИ ТЕАТРҲОИ МАМЛАКАТҲОИ ОСИЁИ МАРКАЗӢ

Душанбе,  26 май. (АМИТ «Ховар», Лутфия  Эшонқулова). —  Имрӯз дар  шаҳри  Алмаато  ҷашнвораи  сеюми  байналхалқии   театрҳои  мамлакатҳои  Осиёи  Марказӣ кушода  шуд. Аз  Тоҷикистон дар ҷашнвораи  мазкур ҳунарпешагони Театри драммавии  мусиқии  ба номи  Камолиддин  Беҳзоди  шаҳри  Хуҷанд иштирок  менамоянд.  Онҳо асари  саҳнавии   драмнавис  Нур  Табаров «Шикасти ташнагӣ» — ро  пешкаши  тамошобинон  ва  ҳайати  доварон  мегардонанд. Аъзои  ҳайати  доварони  ҷашнвора   аз  ҳамаи  мамлакатҳои  минтақа  интихоб  карда шудаанд. Аз Тоҷикистон  ба  ҳайати  доварон узви  шӯрои бадеии  Вазорати  фарҳанг  Иброҳим  Усмонов ва  ба гурӯҳи  мунаққидон  Маҳмадулло  Табаров  шомиланд. Ҷашнвораи  мазкур  ҳар  ду  сол як  маротиба  дар  Алмаато  гузаронида  мешавад. Ҳадафи он  ба  вуҷуд  овардани  фазои  воҳиди  фарҳангӣ, ғанӣ  гардонидани   фарҳанги  мамлакатҳои  минтақа ва  омӯхтани  таҷрибаи  ҳамдигар  мебошад. Ҷашнвора  то  31  май  давом  мекунад.