ҶИНОЯТКОРИИ НАВРАСОН ТАШВИШОВАР ШУДААСТ

Душанбе, 26 май. (АМИТ «Ховар», Лаззат Диловарзод).- Дар давоми чор моҳи сипаришудаи соли 2010  262 ҷинояти наврасон ба қайд гиифта шудааст, ки аз ин 23 ҷиноят аз ҷониби хонандагони мактабҳои таълимоти миёнаи умумӣ, 16 ҷиноят аз ҷониби хонандагони гимназия, коллеҷу литсейҳо ва 200 ҷиноят аз ҷониби наврасони қонуншикан, ки дар ҳеҷ ҷой таҳсил намекунанд ба қайд гирифта шудааст. Тибқи маълумоти  Вазорати корҳои дохилӣ, ҷиноятҳои бештари наврасон ба дуздии молу мулк алоқаманд аст. Айни замон дар ягона Муассисаи ислоҳии ноболиғони ҷумҳурӣ 60 нафар наврасони аз 14 то 18 сола нигоҳ дошта мешаванд. -Сабаби асосии ҷинояткорӣ аз беназорат мондани фарзандон ва аз паи ризқу рӯзӣ шудани падару  модарон ва ворисони онҳо буда, барои тарбияи онҳо ҷудо накардани  вақти зарурӣ  мебошад,- мегӯяд сардори хизмати профилактикӣ ва пешгирии қонунвайронкунӣ миёни ноболиғон ва ҷавонони ВКД Ҷумҳурии Тоҷикистон Қудратулло Азимов.