БЕМОРИИ БАЧАГОНИ ТОҶИК ТАСДИҚ НАШУД

Маскав,  26 май. (АМИТ «Ховар», Кристина  Эрлих ). —  Тавре муовини  вазири  тандурустии  Тоҷикистон  Аъзамҷон  Мирзоев  ба  мухбири  АМИТ «Ховар»  хабар  дод,  ташхиси  хуни  5  нафар  бачагони  аз  Тоҷикистон ба  Русия  омада,   нишон  дод, ки  онҳо ба  бемории   фалаҷи  ҳароммағз  гирифтор  нашудаанд. А.Мирзоев  таъкид  кард, ки  айни  ҳол   паҳн  гардидани  бемории  фалаҷи  ҳароммағз дар  Тоҷикистон  комилан  маҳдуд  гардидааст ва  таҳти  назорати  қатъии  духтурон  қарор  дорад. Гуфтан  мумкин  аст, ки баъди  ба  охир  расидани  даври  сеюми   дорудиҳӣ  ба бачагон,  паҳншавии  беморӣ  коҳиш  хоҳад  ёфт. Бо ташаббуси  Вазорати  тандурустии  Тоҷикистон ва бо  кӯмаки  Созмони  ҷаҳонии  тандурустӣ  то охири   моҳи  май  ба  Тоҷикистон  миқдори  иловагии  дору  оварда  мешавад. Доруи  мазкур  дар  ду  давра  ба бачагони  то 15 — сола  дода  хоҳад  шуд.