ХОНАҲО БАРОИ ЗАРАРДИДАГОН

Хуҷанд,  19 май. (АМИТ «Ховар», Санавбар  Мақсудова). —  Раиси  вилояти  Суғд  Қоҳир  Расулзода  бо  супориши   Сардори  давлат  Эмомалӣ  Раҳмон  ба  ноҳияи  Панҷакент  рафта,  бо  вазъияти   маҳалҳои бар  асари   боришҳои  шадид  харобгардида  шинос  шуд. Тавре  хабар дода шуда буд,  28  апрел  дар  натиҷаи  бориши  боронҳои  шадид  дар  ноҳияи  Панҷакент 16   манзили  истиқоматӣ  зарар  дид.  Аз  ин  ҷумла 5  хонаи  истиқоматӣ  пурра   харобу  валангор  гардид. Инчунин  сел  8  километр роҳи  мошингард,  5  кӯпрук, 45  километр  хати  интиқоли  барқ,  қариб  9  километр  канал  ва  216  гектар   киштзорро  хароб  кард. Ғайр  аз  ин  324  сар   чорво  талаф  ёфт.  Бар  асари  боришҳо  аз  ҳама  бештар  деҳаи  Шӯрчаи   ҷамоати  Халифа Ҳасани  шаҳри  Панҷакент  зарар  дид. Маблағи  зарари  фалокат  қариб 6  миллион  сомониро ташкил  медиҳад. Раиси  вилоят  баъди  шиносоӣ  бо  вазъият  ба  мақомоти  дахлдор  ва  шахсони  масъул  супориш  дод, ки  оқибатҳои   фалокат  то  ҳадди  имкон  ҳар  чи  зуддтар  бартараф  карда  шаванд.  Аз  ҷумла,  117  оила  ба  маҳалли  бехатар  кӯчонида  мешавад.  Бо  ин  мақсад  10  гектар  замин  ҷудо  карда,  дар  ин  ҷо  ба  сохтмони  манзилҳо  шурӯъ  намуданд. Мақомоти  иҷроияи  ҳокимияти  давлатӣ  ба  зарардидагон масолеҳи  бинокорӣ ва  маводи  ғизоӣ  медиҳанд. Раиси  вилоят  зимни  мулоқот бо  сокинони  деҳаи  Шӯрча изҳор  намуд,  барои  16  оила, ки  хонаҳояшон   пурра  хароб  гардидааст,  аз  ҳисоби давлат   хонаҳои нав  сохта  хоҳанд  шуд. Супориш  дода  шуд, ки  сохтмони  хонаҳои нав  то Иди Истиқлолияти  мамлакат,  яъне  то  9  сентябр  анҷом  дода  шавад.