ИШТИРОКИ ҲАЙАТИ ТОҶИКИСТОН ДАР НАМОИШГОҲИ «КИТОБИ ТЕҲРОН»

Душанбе, 8 май.(АМИТ «Ховар», Марзия Саидова).- 8 май як ҳайати беш аз 100 нафари аҳли илму фарҳанг, ноширон, устодони донишгоҳҳо, хабарнигорону рӯзноманигорони тоҷик  ҷиҳати иштирок ва боздид аз 23-умин намоишгоҳи байналмилалии «Китоби Теҳрон» ба Ҷумҳурии Исломии Эрон сафар карданд. Назар ба иттилои аташеи фарҳангию матбуотии Сафорати Эрон дар Душанбе Ҳусайн Ширхонӣ, намоишгоҳи «Китоби Теҳрон» яке аз бузургтарин чорабиниҳои фарҳангӣ дар сатҳи кишварҳои минтақа дар Эрон ба шумор рафта, он дар масоҳати 6 ҳазор метри мураббаъ ташкил карда шудааст. Намоишгоҳ, ки рӯзи 5 май ифтитоҳ ёфт, ҳадафаш муаррифии китобҳои тозанашр, густариши китобдорӣ ва тақвияти ҳамкориҳо дар бахши китоб ва китобдорӣ байни нашриётҳои кишварҳои гуногуни  ҷаҳон аст. Дар намоишгоҳ 1200 нашриёт аз 80 давлати ҷаҳон китобҳои тозанашри худро ба маърази тамошо мегузоранд. Дар намоишгоҳ гӯшаи Тоҷикистон низ ифтитоҳ карда шудааст, ки дар он як ҳайате аз Вазорати фарҳанги ҷумҳурӣ нашри китобҳои нав дар Тоҷикистонро муаррифӣ месозад. Намоишгоҳи «Китоби Теҳрон» бо ибтикори Вазорати фарҳанг ва иршоди исломии Эрон гузаронида шуда, он 10 рӯз идома меёбад.