МАҶЛИСИ ШӮРОИ ЭЛЕКТРОЭНЕРГЕТИКИИ ИДМ

Душанбе,  28 май. (АМИТ «Ховар», Наталя  Михайлова). —  27  май  дар  шаҳри  Угличи вилояти  Ярослави  Федератсияи  Русия  маҷлиси  навбатии  37 – уми  Шӯрои  электроэнергетикии Иттиҳоди Давлатҳои  Мустақил  кушода шуд. Маҷлиси  мазкур  то 30  май давом  мекунад.  Дар  он  вазирони  энергетикаи  мамлакатҳои  ИДМ, роҳбарони  корхонаю  ширкатҳои  калонтарини  энергетикии  мамлакатҳои  иттиҳод  ва ташкилотҳои  энергетикии  Русия  иштирок  доранд. Аз  Тоҷикистон дар  маҷлис  раиси  ширкати  саҳҳомии «Барқи тоҷик» Абдулло Ёров  ва  муовинони  сармуҳандиси   ширкати  мазкур  Рашид  Гулов  ва  Рустам  Раҳимов  ширкат  меварзанд. Иштирокчиёни  маҷлис  масъалаҳои  ҳамкориро  бо  созмонҳои  энергетикии байналмилалӣ, ҳамоҳанг  сохтани ҳуҷҷатҳои  меъёрии  соҳавӣ, таъминоти  метрологии  беҳтар  сохтани   сифати қувваи барқ,  масъалаҳои  хариду  фурӯши  қувваи  барқ,   истифода бурдани   манбаъҳои  дигари  қувваи барқ  ва  ғайраро  муҳокима  мекунанд. Мухбири  АМИТ «Ховар»  хабар  медиҳад, ки  ба  ҳайати  Шӯрои электроэнергетикии  ИДМ  роҳбарони  аввалини  мақомоти  идораи   соҳаи  энергетикаи  Озарбойҷон, Арманистон, Белорусия, Қазоқистон,  Қирғизистон,  Молдавия,  Русия, Тоҷикистон, Туркманистон, Ӯзбекистон ва  Украина  дохиланд.