МЕВАИ ХУШК САБАБИ ПАҲН ГАРДИДАНИ БЕМОРӢ НЕСТ

Душанбе,  8 май. (АМИТ «Ховар»,  Фарангис  Раҳимова). —  Зимни  мулоқоти  вазири  корҳои  хориҷии  Ҷумҳурии  Тоҷикистон  Ҳамрохон  Зарифӣ  бо  сафири  Федератсияи  Русия  дар  Тоҷикистон  Юрий Попов изҳор  карда  шуд, ки  қарори  Хадамоти  давлатии   назорати  ҳифзи  ҳуқуқи  истеъмолгарони  Русия  дар  бораи  манъи  ворид  сохтани  меваи  хушк  ва  чормағз  аз  Тоҷикистон ба  ин  мамлакат  ба  иқтисодиёти  ҷумҳурӣ  зарари  калон  расонида  метавонад. Ҳ.Зарифӣ  ба  сафири  Русия  ёддошт  супорида  хоҳиш  намуд, ки   имконияти   бекор  кардани  қарори  мазкур  баррасӣ  карда  шавад. Дар  мактуби  сардухтури  санитарии  давлатии   Русия  Геннадий  Онишенко  ба  унвони  роҳбарони   муассисаҳои тобеъ   фиристодашуда,  гуфта  мешавад, ки  бо  назардошти   равобити  доманадори  тиҷоратӣ  байни  ҳар  ду  кишвар   ба  воситаи  меваҳои  хушк  ва  чормағз  ба  Русия  ворид  сохтани  микробҳои бемории   хавфноки  варами  ҳароммағз  аз  Тоҷикистон  имконпазир  аст.  Бинобар  ин  ба  роҳбарони  ҳамаи   ташкилоту  идораҳои  дахлдори тиҷоратӣ,  аз  ҷумла  нақлиёти  ҳавоӣ  ва роҳи оҳан  пешниҳод  карда  мешавад, ки  ба  ворид  сохтани   меваи  хушк  ва  чормағз  аз Тоҷикистон  ба  қаламрави  Русия  роҳ надиҳанд. Бояд  гуфт, ки   меваи  хушк  ва  чормағз  ба  Русия  асосан   аз  ҳудуди  вилояти  Суғд   фиристода  мешавад. То имрӯз  дар  ин  ҷо   ягон  бемори гирифтори  илтиҳоби  ҳароммағз ба  қайд  гирифта  нашудааст. Дар  масъалаи  мусодира  кардани   меваи  хушк  аз   муассисаҳои  савдо  қайд  кардан  зарур  аст, ки  қисми  зиёди онҳо ба  Русия  ҳанӯз  соли  2009  фиристода  шуда буд  ва  ба  вазъияти  имрӯзаи  эпидемиологии  мамлакат   ягон  дахл  надорад.  Соли  2009  аз  Тоҷикистон ба  Русия   бештар  аз  сад  ҳазор тонна  меваи  хушк   фиристода  шудааст.  Қариб  90  ҳазор тоннаи  он  аз  вилояти  Суғд  содир  гардидааст.  Роҳбари  намояндагии  Созмони  ҷаҳонии  тандурустӣ дар  Тоҷикистон  Сантино Северони   зикр  намуд, ки  микроби  бемории  илтиҳоби  ҳароммағз  ба  воситаи  хӯрок  ба шахси  дигар  сироят  намекунад. Паҳнкунандаи беморӣ   асосан   шахси  бемор  мебошад.  Аз  рӯи  маълумоти  Вазорати тандурустӣ,  бемории  мазкур   дар  шаҳри  Душанбе  ва  баъзе  ноҳияҳои  вилояти  Хатлон  ба  қайд  гирифта шудааст. То  5  майи  соли  равон  32  ҳолати  ба  ин  беморӣ   гирифтор  шудани одамон  ба  қайд  гирифта  шуд.  Аз  ин  ҷумла,  як  бемор  вафот  кард. Беморони  дигар  дар  шифохонаҳо  табобат  карда  мешаванд  ва  вазъи  саломатии онҳо  қаноатбахш  мебошад. Вазорати тандурустии  Тоҷикистон   барои  омӯзиши  вазъи  эпидемиологӣ  мутахассисони  Созмони  ҷаҳонии тандурустиро  ба  мамлакат   даъват  намуд. Айни  ҳол  бо  кӯмаки  Созмони  ҷаҳонии  тандурустӣ ва  Муассисаи  наҷоти  атфоли  СММ дар  саросари  мамлакат  барои  пешгирии  бемории  мазкур  ба  ҳамаи  бачагони то  6  сола  дору  дода  мешавад.