ШИКАСТАПОРАҲОИ ҲАВОПАЙМО ЁФТ ШУДАНД

Кобул, 20 май. (АМИТ «Ховар»). -Наҷотдиҳандагон дирӯз  шикастапораҳои  ҳавопаймои  мусофирбари   ширкати хусусии ҳавонавардии «Помир Айрвайс» — ро  дар  ағбаи  Соланг  пайдо  намуданд. Дар  ин  бора  агентии   иттилоотии  Афғонистон «Бохтар»  хабар  дод. Тавре  хабар  дода шуда буд,  ҳавопаймои  мазкур  17  май  бо  44  нафар  мусофир  аз  шаҳри  Кундуз  ба  самти  Кобул   парвоз  карда буд.  Вале он  ба  маҳалли  таъиншуда  нарасида,  ба  фалокат  дучор  гардид.  Тахмин  карда  мешавад, ки   сарнишинони  ҳавопаймо  бо  сабаби  вазъи  номусоиди  ҳаво  онро  идора  карда  натавонистаанд.  Вале  коршиносон  изҳор  намуданд, ки то  ҳол  сабаби  асосии   ба  фалокат   дучор  гардидани  ҳавопаймо  аниқ  муайян  нашудааст. Хабар  дода  мешавад, ки  аз  ҷумлаи  мусофирони  ҳавопаймо  се  нафар  шаҳрванди  Британияи  кабир  ва  як  нафар  шаҳрванди  ИМА  мебошанд.  Сафоратхонаи  Русия  дар  Кобул   хабар  дод, ки   дар  байни  сарнишинони  ҳавопаймо   шаҳрванди  Русия  ва  Тоҷикистон  Александр  Демуров  низ   буд. Ӯ  мувофиқи  қарордод  дар  ширкати  ҳавонавардии  Афғонистон  кор  мекард.