ЗАРАРИ ОФАТИ ТАБИӢ ДАР МУЪМИНОБОД

Кӯлоб, 18 май. (АМИТ «Ховар», Сулаймон  Холов.) — Шаби  6-7-уми  май    дар   натиҷаи  боронгарии   зиёд  дар ноҳияи  Муъминобод    обхезӣ ба  амал  омад, ки дар  натиҷа  аксари  хонаҳои  истиқоматӣ,  купруку  роҳҳо,  заминҳои  кишоварзӣ  ва  иншоотҳои  ёрирасони  шаҳрвандон  зарари  ҷиддӣ  диданд.  Ҷамахон   Шарифов   сардори  ситоди  ҳолатҳои   фавқулодда  ва  мудофиаи  граждании  ноҳияи мазкур   дар  бастагӣ  ба  ин мавзӯъ  гуфт, ки   дар  ин офати  табиӣ зиёда аз 309 хонаи  истиқоматӣ, 125  гектар  заминҳои  кишоварзӣ,  6 гектар  боғ  , 101  чорвои  калон  ва моли  майда   зери  об  монданд,  ки   маблағи  зарари  онҳо  дар  маҷмӯъ  9 млн. 997 ҳазору 425  сомониро  ташкил  медиҳад. Ба  гуфтаи  ин  манбаъ  барои    барқарор    кардани   ҷойҳои  зарардида   кормандони   ҳукумати  ноҳия,  ва   тамоми    ташкилоту  муаасисаҳо   сафарбар  гардидаанд.Мавриди  зикр  аст, ки  барои  мардуми  офатзадаи  ноҳия  аз  тарафи     захираҳои   модии  давлатии  Ҷумҳури Тоҷикистон   маводи  хӯрока  аз  қабили  20 т орд, 10 т  шакар, 5 т равған,  10 т  биринҷ  ва  10 т  сӯзишворӣ   ёрии   амалӣ  расонида  шудааст. Гуфта  мешавад,  дар  ин  самт   ташкилоти  ғайридавлатии «КАРИТАС» — и  Шветсария низ  саҳми худро  гузошта 1 т сузишворӣ  барои  барқарор  кардани  роҳҳои   зарардидаи  ноҳия  ёрии  амалӣ  расонидааст.