320 КГ МАВОДИ НАШЪАДОР БА ДАСТ АФТОД

Маскав, 23 июн. (АМИТ «Ховар», Ҳалима Хушқадамова). – Амалиёти  навбатии  муштараки  кормандони мақомоти   муҳофизи   қонуну  тартиботи  Русия  ва  Озарбойҷон  бо  мусодираи  320  килограмм  моддаи  нашъадори   хашиши  истеҳсоли  Афғонистон  анҷом  ёфт. Аъзои  фаъоли  гурӯҳи  қочоқчиёни  байналхалқии  маводи  нашъадор  дар  шаҳри   Санкт – Петербург  дастгир  карда шуданд.  Маводи  нашъадор  аз  Афғонистон  ба бандари  Анзолии Эрон,  аз  он ҷо  ба  воситаи  киштӣ  ба  шаҳри  Астрахан  ва баъдан  ба  воситаи  мошини  боркаш  ба  Санкт – Петербург  интиқол  дода шуд. Маводи  нашъадор  дар ҷойҳои  сӯрохкардашудаи  тахтасангҳои  мармарӣ   пинҳон  карда  шуда буд. Маводи нашъадор  ва  тахтасангҳои  мармарӣ   дар  дохили   қуттиҳои  чӯбин  интиқол  дода  мешуд.  Қочоқчиён   маводи  нашъадорро  дар   халтаҳои  полиэтиленӣ  ҷой  дода буданд.  Ҳар  халта   мӯҳри  махсуси  худро  дошт. Ин  шаҳодат  медиҳад, ки  моддаи  нашъадор  дар  Афғонистон  истеҳсол  карда шудааст. Айни  ҳол   дар  бораи  175  лабораторияи  махсуси  дар Афғонистонбуда  маълумоти  аниқ  ба даст оварда шуд. Ҳар  кадоми онҳо   нишона  ва  мӯҳри  махсуси  худро  дорад. Бояд  гуфт, ки  маводи  нашъадор   аз  ҳосили   соли  равон  тайёр  карда шудааст. Аз  моддаи  нашъадори   мусодирашуда қариб  1  миллион  воя  тайёр  кардан  мумкин  аст.  Агар   кори  қочоқчиён  барор  мегирифт,  онҳо   маводи  нашъадорро  фурӯхта  соҳиби  зиёда  аз  96  миллион  рубли  Русия  мешуданд.