49 КГ МАВОДИ МУХАДДИР ДАРЁФТ ВА МУСОДИРА КАРДА ШУД

Душанбе, 14 июн. (АМИТ «Ховар», Жасмин Назарова). — Ҳангоми гузарондани чораҳои фаврӣ-ҷустуҷӯӣ дар ҳудуди деҳаи 50-солагии Тоҷикистон, ҷамоати Комсомоли ноҳияи Фархори вилояти Хатлон шаҳрванди Ҷумҳурии Исломии Афғонистон Ғулом Валади Сахӣ, соли таваллудаш 1980, истиқоматкунандаи вилояти Тахор, улусволии Растак,  дастгир карда шуд. Тавре аз дафтари маркази матбуоти Вазорати корҳои дохилии ҶТ иттилоъ доданд, ҳангоми гузаштан аз марзи Тоҷикистон  дар лаби дарёи Панҷ аз борхалтаи ӯ 37 кг 285 гр бангдона, 11 кг 305 гр героин, ки вазни умумии онҳо 48 кг 590 гр ташкил медод, дарёфт ва мусодира карда шуд. Айни замон парвандаи ҷиноӣ оғоз шуда тафтишот идома дорад.