БЕКОР КАРДАНИ АҚДИ НИКОҲ ЯК ҲОДИСАИ МАЪМУЛӢ

Душанбе, 1 июн. (АМИТ «Ховар», Лаззат Диловарзод).- Аз рӯи маълумоти оморӣ, бекор кардани ақди никоҳ дар шаҳру ноҳияҳои ҷумҳурӣ рӯ ба афзоиш аст ва онро чун як ҳодисаи маъмулӣ қабул мекунанд. Дар 5 соли охир (2005 — 2009) бекор кардани ақди никоҳ аз 2900-и  дар соли 2005 ба қайд гирифташуда,  дар соли 2009 ба 5 ҳазору 900 нафар расидааст. Танҳо дар соли 2009 мақомоти сабти асноди ҳолати шаҳрвандӣ зиёда аз 100 ҳазор ҳолати бастани ақди никоҳ ва қариб 6 ҳазор бекор кардани онро   ба қайд гирифтаанд. Аз ҷумлаи талоқшудагон 3770 нафар бо қарори судҳо ақди никоҳашон бекор карда шудааст. Аз ин рӯ, дар Қонуни оилаи ҷумҳурӣ бо  мақсади беҳтар омода шудани ҷавонон ба зиндагии мустақил, таъмини шароити оилаю оиладорӣ  ва тақвият додани риояи манфиатҳои ҷавонон ба қонунгузорӣ дар бораи аз 17 ба 18- солагӣ баланд кардани синну соли никоҳӣ тағйирот  ворид карда шуд.