БЕТАРТИБИҲОИ НАВ ДАР ӮШ

Душанбе,  11 июн. (АМИТ «Ховар»). —  Тибқи  хабарҳои  аз  Бишкек расида,  вазъияти  шаҳри  дуюми  калонтарини  Қирғизистон —  Ӯш тӯли  рӯзҳои охир  хеле  ноором  ва  муташанниҷ  гардид.  Бетартибиҳо дар  ин  ҷо  шаби  гузашта баъди  задухӯрдҳои   гурӯҳҳои  ҷавонони  қирғиз  ва  ӯзбек  оғоз  ёфтанд.  Бояд  гуфт, ки дар  шаҳри  Ӯш  теъдоди  зиёди  ӯзбекҳо  зиндагӣ  мекунанд. Задухӯрҳои  ҷавонон  тадриҷан   ба  бетартибиҳои оммавӣ  табдил  ёфтанд.  Теъдоди  зиёди  одамон  дар  маркази  шаҳр  дар  назди  меҳмонхонаи  Олой ҷамъ  омад. Ҷамъомадагон   мошинҳои  роҳгузарро  дошта,  онҳоро  оташ  зада,  мағозаю  дӯконҳо  ва ташкилоту  идораҳоро  ғорат   карданд.  Дар  натиҷаи бетартибиҳо 4  нафар  ҳалок ва 53  нафар   маҷрӯҳ  шуд.  Вазъи  саломатии  7  нафари  дигар  хеле  вазнин  мебошад. Мақомоти  ҳукуматӣ  дирӯз   дар  шаҳрҳои Ӯш ва Ӯзген,  инчунин  ноҳияҳои  Қаросу,  Аравон ва  ғайра   вазъияти  фавқулодда  ва  қуюди  шабгардӣ  ҷорӣ  намуданд. Барои  таҳти назорат  гирифтани  вазъият  қисмҳои  ҳарбӣ  ва  техникаи  низоми  ба  шаҳри Ӯш   фиристода шуданд.