БОНКИ РУШДИ ЕВРАЗИЯ БА ТОҶИКИСТОН ҚАРЗ МЕДИҲАД

Душанбе,  21 июн. (АМИТ «Ховар»). —  Шӯрои  фонди   зиддибӯҳронии  Ҷомеаи  иқтисодии  Евразия   аризаи   Тоҷикистонро  дар  бораи  додани   қарз ба  маблағи  70  миллион   доллари  ИМА  қонеъ  гардонд.  Қарзи  мазкур   ба  мӯҳлати  20  сол  дода,  аз он  ба  андозаи  1  фоиз  фоидаи  солона  гирифта  мешавад. Ҳадафи  асосии қарз  дастгирӣ  ва беҳтар  сохтани   маблағгузории  буҷет  ба  соҳаҳои   иҷтимоӣ,  аз  ҷумла,  маориф  ва  тандурустӣ  мебошад. Бонки  рушди  Евразия  ба Шӯрои  фонди зиддибӯҳронӣ тавсия  дод, ки дар  оянда  ҳам ба  Тоҷикистон  барои   бартараф  сохтани оқибатҳои бӯҳрони ҷаҳонии  молиявӣ  кӯмак расонад.