Ф. ЛЕРЕНЗО БА ТАШКИЛИ КОНФРОНСИ «ОБ — БАРОИ ҲАЁТ» БАҲОИ БАЛАНД ДОД

Душанбе, 8 июн. (АМИТ «Ховар», Бекназари Абӯбакр). — Дар доираи баргузории Конференсияи байналхалқии сатҳи баланд оид ба баррасии фарогири миёнамуддати рафти татбиқи Даҳсолаи байналмилалии амалиёти «Об — барои ҳаёт» 2005-2015 имрӯз, 8 июн Сарвазири Тоҷикистон Оқил Оқилов бо Президенти Ширкати «South-South News» Френсиз Лорензо мулоқот кард. Дар ҷараёни мулоқот масоили дурнамои ҳамкориҳои Тоҷикистон бо ин ширкати бонуфузи байналмилалӣ, татбиқи Барномаи Ҳадафҳои Рушди Ҳазорсола ва самтҳои афзалиятноки таваҷҷӯҳи ҷонибҳо муҳокима ва баррасӣ гардид. О. Оқилов аз ҷонибдорӣ ва мусоидати  Ширкати «South-South News» дар самти баргузории Конференсияи байналхалқии сатҳи баланд оид ба баррасии фарогири миёнамуддати рафти татбиқи Даҳсолаи байналмилалии амалиёти «Об — барои ҳаёт» 2005-2015 дар Душанбе изҳори сипос карда, тазаккур дод, ки Тоҷикистон минбаъд низ ҳамкориро бо ин ширкат дар сатҳи зарурӣ идома медиҳад. Гуфтанист, ки Ширкати «South-South News» яке аз аввалинҳо шуда иқдоми Президенти Тоҷикистонро дар мавриди гузаронидани Конфрон оид ба баррасии татбиқи Даҳсолаи байналмилалии амалиёти «Об — барои ҳаёт» ҷонибдорӣ ва дастгирӣ намуда, дар раванди амалигардии он мусоидат намудааст. Ф. Лорензо сатҳи равобити Тоҷикистонро бо Ширкати «South-South News» баланд арзёбӣ карда, ба Ҳукумати Ҷумҳурии Тоҷикистон ҷиҳати дар сатҳи баланд ташкил намудани конфронс изҳори сипос намуд. Дар ин мулоқот ҳамзамон ҷонибҳо роҷеъ ба равобит ва ҳамкориҳои Тоҷикистон бо дигар сохторҳои СММ мубодилаи афкор карданд.