ИМЗОИ ДУ СОЗИШНОМА БО БОНКИ ДАВЛАТИИ РУШДИ ХИТОЙ

Душанбе, 2 июн. (АМИТ «Ховар», Покиза Маҳмадбекова). Имрӯз, 2 июн  дар шаҳри Пекини Ҷумҳурии халқии Хитой вохӯрии намояндагони Бонки давлатии амонатгузории Ҷумҳурии Тоҷикистон «Амонатбонк» ва Бонки давлатии рушди Хитой баргузор гардид. Ба мухбири АМИТ «Ховар» сардори Хадамоти матбуот ва рекламаи БДА ҶТ «Амонатбонк» Марҳабо Муродова иттилоъ дод, ки дар рафти вохӯрӣ Раиси Раёсати Бонки давлатии рушди Хитой ҷаноби Чен Юан қайд кард, ки дар оянда аз ҷониби ин Бонки бонуфӯз, ки сармояи умумии он зиёда аз 50 миллиард доллари амрикоиро ташкил медиҳад, якчанд лоиҳаҳои инвеститсионӣ дар Ҷумҳурии Тоҷикистон дастгирӣ хохад шуд.   Ҳамчунин, маросими ба имзо расидани ду созишнома, яке ба андозаи 5 миллион доллари амрикоӣ барои дастгирии соҳаҳои хоҷагии қишлоқ ва соҳибкории хурду миёна ва дигаре ба андозаи 33 миллион юани Хитои барои равнақу ривоҷ додани савдои беруна бо Ҷумҳурии халқии Хитой ба имзо расиданд. Созишномаҳоро аз ҷониби Бонки давлатии амонатгузории Ҷумҳурии Тоҷикистон «Амонатбонк» Раиси Раёсати Бонк – Гулнора Ҳасанова  ва аз ҷониби Бонки давлатии рушди Хитой Раиси Раёсати  Бонк — Чен Юан ба имзо расониданд.