МАЪЛУМОТ БАРОИ РУШДИ СОХТОРИ МОЛИЯВӢ ДАР ҶУМҲУРИИ ТОҶИКИСТОН

Душанбе, 15 июн. (АМИТ «Ховар», Покиза Маҳмадбекова). —   Имрӯз бо мақсади дастгирии Бюрои маълумот оид ба қарз дар Ҷумҳурии Тоҷикистон, ки чанде пеш таъсис дода шуд, IFC ва Ташкилоти Олмон оид ба кӯмаки техникӣ бо ҷалби Бонки Миллии Тоҷикистон зиёда аз 90 мутахассисонро аз бонкҳо, ташкилотҳои молияи хурд, ширкатҳои мобилӣ ва муассисаҳои хизматрасониҳои гуногун ва ташкилотҳои омӯзиши касбӣ сарҷамъ намуданд, то онҳоро оид ба таҷрибаи пешқадам оид ба мубодилаи маълумот дар бораи қарз, ки дар сатҳи байналхалқӣ эътироф шудааст, омӯзонанд. “Таъсиси системаи боэътимод ва самараноки мубодилаи маълумот барои рушди сохтори молиявӣ дар Ҷумҳурии Тоҷикистон масъалаи аввалиндараҷа мебошад. Омӯзиши мазкур ба иштирокчиён имкон медиҳад, ки роҳҳои ба ҳадафи мазкур расиданро аз худ намоянд” – гуфт сардори Шӯъбаи назорати бонкӣ ва иҷозатномадиҳии Бонки Миллии Тоҷикистон Искандар Давлатов. “Мо ба IFC барои дастгирии мунтазам дар соҳаи мазкур миннатдорӣ баён намуда, умедворем чунин ҳамкории самараноки мо давом хоҳад ёфт.”   Омӯзиш дар доираи лоиҳаи IFC оид ба беҳтар кардани муҳит баҳри рушди Бюрои хусусии маълумот оид ба қарз дар Ҷумҳурии Тоҷикистон, ки моҳи апрели соли 2010 расман ба қайд гирифта шуд, гузаронида шуда истодааст. Пас аз он, ки бюро фаъолияти худро пурра оғоз мекунад, муассисаҳои молиявии Ҷумҳурии Тоҷикистон ва дигар муассисаҳои дахлдор ба монанди ширкатҳои мобилӣ ва муассисаҳои истифодабарандагони ҷамъиятӣ ба маълумоти боваринок ва беғараз оид ба қарзгирандагон саривақт дастрасӣ хоҳанд пайдо намуд, ки ба онҳо ҷиҳати камтар сарф кардани вақт барои амалиётҳои қарздиҳӣ, кам кардани ҳаҷми қарзҳои пардохтношуда ва додани қарзи бештар ба соҳибкорони хурду миёна  имкон медиҳад. “Мақсад аз баргузор намудани омӯзиши мазкур шинос намудани муассисаҳои молиявӣ бо таҷрибаи пешқадами дар сатҳи байналхалқӣ эътирофгардида оид ба ҷараёни мубодилаи маълумот дар бораи қарз мебошад. Ман умедворам таҷрибаи дар ин соҳа доштаи IFC ба мутахассисони соҳаи бонки Ҷумҳурии Тоҷикистон барои васеъ кардани дониши худ ва ҷиҳати барпо намудани шароити мусоиди соҳибкорӣ баҳри фаъолияти бюрои қарз имконият фароҳам меорад,” қайд намуд Мушовири IFC оид ба бюрои қарз ва идоракунии хавф Оскар Мадеду.