МУЛОҚОТИ Э. РАҲМОН БО КОТИБИ ДАВЛАТИИ ПОРТУГАЛИЯ

Душанбе,  9 июн. (АМИТ «Ховар»,  Фирдавс  Таваров). —  Президенти  Ҷумҳурии  Тоҷикистон  Эмомалӣ  Раҳмон  дирӯз   баъди  чошти  8  июн   бо  котиби давлатии  корҳои  хориҷӣ  ва  ҳамкории  Португалия  Жоао Гомеш  Кравино мулоқот  кард, ки  барои  иштирок  дар   Конфронси   байналхалқии  намояндагони  воломақоми  мамлакатҳои  ҷаҳон   бахшида ба  ҷамъбасти  натиҷаҳои  даври  аввали  Даҳсолаи  байналмилалии  амалиёти  «Об  барои  зиндагӣ»  ба  Тоҷикистон  ташриф  овардааст. Ж.Кравино  баъди  мулоқоташ   бо   Президенти  Ҷумҳурии  Тоҷикистон   ба  хабарнигорони  дохилию  хориҷӣ  хабар  дод, ки   ҳамроҳи  Президент  роҳҳо   ва  имкониятҳои густариши  ҳамкории Тоҷикистону  Португалия, масъалаҳои  истифодаи  самарабахши  захираҳои об  ва  имконияти  гузоштани   сармояи  мамлакаташро   ба  иқтисодиёти  Тоҷикистон  муҳокима  кардааст. Ба  қавли   Котиби  давлатии  Португалия,  мамлакаташ  тайёр  аст,  бо  Ҳукумати  Ҷумҳурии  Тоҷикистон  дар  бораи  сарфи  назар  кардани   андозбандии  дубора   аз   ҳамлу  нақли  мол   дар  байни  ҳар  ду  кишвар   созишнома  имзо  кунад. Қайд  карда  шуд, ки  созишномаи  мазкур  ба  ҷалби  сармояи  соҳибкорони  Португалия  ба  иқтисодиёти  Тоҷикистон  мусоидат  хоҳад  кард.