«НЕВСКИЙ»- РО ҚАБУЛ НАКАРДАНД

Душанбе, 4 июн.(АМИТ «Ховар», Лаззат Диловарзод).- Бо офатҳои табиӣ соли ҷорӣ қариб дар  ҳамаи ноҳияҳои ҷумҳурӣ ба хоҷагиҳои кишоварзӣ ва маҳалҳои зист хисороти зиёд ворид шуд.  Дар баъзе минтақаҳои ҷумҳурӣ миқдори зарари аз боронҳои шадид ба амаломада, аз ҷумла дар шаҳри Хуҷанд, ноҳияҳои Табошар, Ҷаббор Расулов, Нов ва Ғончӣ, ки 26 –уми май рух додааст,  ҳанӯз муайян карда нашудааст. Бояд тазаккур дод, ки аз ҷониби Созмони Милали Муттаҳид ба 1019 хоҷагиҳои аз заминларза  зарардидаи ноҳияи Ванҷ    20 тонна тухмии гандуми навъи «Басирбай», ки хеле серҳосил аст бо 15 тонна карбамид кӯмак расонида шуда,    ба ҳар як  сари хоҷагӣ 20 кг гандум ва 15 кг карбамид тақсим карда дода шуд. Дар баробари ин ба зарардидагон 100 тонна картошкаи навъи «Невский» барои кишт низ пешниҳод гардид, аммо бо сабаби гузаштани мавсими кишти баҳории картошка хоҷагиҳо аз қабул ва кишти он даст кашиданд.