НИСБАТИ СОЛИ ГУЗАШТА ДАР ВАЗОРАТИ ФАРҲАНГ МАҶАЛЛА КАМ БА ҚАЙД ГИРИФТА ШУДААСТ

Душанбе, 29 июн. (АМИТ «Ховар», Лутфия Эшонқулова).-Дар Вазорати фарҳанги Ҷумҳурии Тоҷикистон аз аввали соли ҷорӣ 20 рӯзномаи нав ва 5 маҷалла сабти ном шудааст, ки ин нисбат ба ҳамин давраи соли гузашта 2 рӯзнома зиёд ва 19 маҷалла камтар аст. Тавре ба АМИТ «Ховар» аз маркази матбуоти Вазорати фарҳанг хабар доданд, соли 2009 дар нимсолаи аввал 24 маҷалла ва 18 рӯзнома сабти ном шуда буд. Тибқи иттилои Раёсати табъу нашр ва матбуоти даврии вазорат соли ҷорӣ маҷаллаи «Паёми донишкадаи ҳарбӣ», «Осори Академия», «Навниҳол», «Ҷарроҳии Тоҷикистон» и «Паёми Пажуҳишгоҳ» ва ғайра ба қайд гирифта шудааст. Бештари ин маҷаллаҳо соҳавӣ буда, муассисони онҳо идораҳои гуногун мебошанд. Бояд гуфт, аз 20 рӯзномаи ба қайдгирифташуда («Аркон», «Мино», «Рӯзномаи Роҳнамо», «Мавқеъ», «Паёми Рашт», «Маърифати ҳуқуқӣ», «Ҳаёт», «Деловой вестник: Недвижимость: Работа и карьера», «Паёми Душанбе», «Имруз — news», «Деловой Таджикистан», «Экспресс газета в Таджикистане», «Дерматолог», «Лозар», «Набзи рӯз», «Оламафрӯз», «Иқбол», «Шикорчӣ», «Пайванд», «Заминсоз», «Ҳақиқати Суғд») 7-тоаш соҳавӣ ва боқимонда хусусӣ мебошанд. Аз инҳо 9-тоаш дар Душанбе, 8-то дар Суғд, 2-то дар ВМКБ ва 1-то дар Води Рашт нашр мешаванд. Ёдрас мешавем, ки то имрӯз дар Вазорати фарҳанг 240 рӯзнома ба қайд гирифта шудааст, ки аз онҳо 139-тоаш дар Душанбе чоп мешавад ва 52-тои он давлатӣ, 119-то ҷамъиятӣ, 32-то хусусӣ ва 37-то соҳавӣ мебошанд.