ШИКАСТАНИ ҚУЛФИ ДАР МУШКИЛОТЕ НАДОРАД

Душанбе, 1 июн. (АМИТ «Ховар», Жасмин Назарова). – Ба шӯъбаи корҳои дохилии ноҳияи И. Сомонӣ Далер Нурхонови 33 – сола, сокини пойтахт муроҷиат намуд, ки охири моҳи марти соли равон шахсони номаълум бо тариқи шикастани қулфи дари гараж, аз он ҷо 4 адад велосипеди тамғаи гуногун, ки 300 доллари ИМА арзиш дошт, дуздида аз ҷои ҳодиса ғайб мезанад. Тавре ба хабарнигори АМИТ «Ховар» аз дафтари матбуоти Вазорати корҳои дохилии ҶТ иттилоъ доданд, ҳангоми гузарондани чораҳои фаврӣ-ҷустуҷӯӣ шаҳрванд Аъзам Буриеви 18 — сола, сокини пойтахт, дастгир карда шуд. Айни замон ҷинояткори дуюм дар кофтуков қарор дорад. Нисбати ин далел парвандаи ҷиноӣ оғоз шуда, тафтишот идома дорад.