СОХТМОНИ БИНОҲОИ БАЛАНДОШЁНА ТО ҶАШНИ 90-СОЛАГИИ ПОЙТАХТ

Душанбе, 15 июн.(АМИТ «Ховар», Марзия Саидова).- То ҷашни 90-солагии шаҳри Душанбе, ки соли 2014 таҷлил карда хоҳад шуд,  дар қисмати кӯчаҳои протоколӣ, аз ҷумла  кӯчаи А.Дониш — С. Айнӣ -хиёбони Рӯдакӣ-Чорбоғ, бо тасмими шаҳрдорӣ  биноҳои баландошёнаи маъмурӣ бо инобати марказҳои мухталифи хизматрасонӣ дар ошёнаи аввал сохта мешаванд. Тадбири мазкур бо мақсади татбиқи Нақшаи генералии шаҳри Душанбе амалӣ гардонида мешавад. Масъалаи мазкур дар ҷаласаи шаҳрдорӣ, ки дар ҳузури Раиси шаҳри Душанбе Маҳмадсаид Убайдуллоев баргузор шуд,  баррасӣ гардид. Ҳамзамон,  дар ҷаласа барои иҷрои Қарори марбутаи Маҷлиси вакилони халқи шаҳри Душанбе,  раисони ноҳияҳои пойтахт якҷоя бо кумитаи заминсозӣ ва сарраёсати меъморӣ ва шаҳрсозии шаҳри Душанбе вазифадор гардиданд, ки барои эҳтиёҷоти сокинони шаҳр, ки ба парвариши чорвои хонагӣ ниёз доранд,  дар чор минтақаи дар таносуби ноҳияҳо буда, то 1 сентябри соли 2010 вобаста намудани қитъаҳои заминро барои бунёди  нуқтаҳои парвариш ва нигаҳдории чорвои хонагӣ ҳаллу фасл созанд.