ТАҶЛИЛИ РӮЗИ БАЙНАЛМИЛАЛИИ ҲИФЗИ КӮДАКОН ДАР КӮЛОБ

Кӯлоб,  1 июн. (АМИТ «Ховар», Сулаймон  Холов). —  Субҳи  имрӯз  дар  шаҳри  Кӯлоб  бахшида ба  Рӯзи  байналмилалии ҳифзи  кӯдакон  ҷамъомади  серодам  баргузор  гардид.  Ҷамъомад  дар  Боғи  фарҳангу  фароғатии  шаҳр  ташкил  карда шуд. Дар он   вакили Маҷлиси  намояндагони  ҷумҳурӣ Хайринисо  Юсуфӣ,  раиси  Кумитаи  иҷроияи  ҷунбиши   ваҳдати  миллӣ Қурбон  Восеъ,  директори  генералии  хазинаи  хайрияи «Сарпараст» Маҳмудҷон  Муродов,  шоирону  нависандагон, гурӯҳи  омӯзгорону  равоншиносон,  кормандони   китобхонаҳои  бачагона,  намояндагони  корхонаю  муассиса  ва  ташкилотҳои  маҳаллӣ,  аҳли  ҷамъият  ва  хабарнигорон  ширкат  варзиданд. Нотиқон  зикр  карданд, ки   давлат   ва  Ҳукумати  мамлакат  ҳамеша  ба  кӯдакон  ва наврасон   ғаморӣ  зоҳир  намуда,  барои   таъмини  шароити  зиндагӣ, таҳсил  ва   касбомӯзии онҳо   шароити   мусоид  фароҳам  меоранд. Сипас  иштирокчиёни  ҷамъомад   намоишгоҳи   маҳсули  дастони  устоҳои   халқӣ   ва  талабагони  мактабҳои  миёнаи  шаҳрро  тамошо  карданд. Ассосиатсияи  кӯдакону наврасони  ҷумҳурӣ ба  мактабҳои  шаҳри  Кӯлоб 319  ҷилд  китоб  тӯҳфа  кард.  Дар  қисмати  дуюми  ҷамъомад  маросими  супоридани  ифтихорномаҳо ва  тӯҳфаҳои  хотиравӣ  ба  кормандони  беҳтарини  китобхонаҳо,  озмуни  шеър  ва  рассомони наврас  гузаронида шуданд.