ВАКИЛОН ДАР АМАЛӢ ГАРДОНИДАНИ ҲАДАФҲОИ СТРАТЕГИИ КИШВАР ФАЪОЛ МЕГАРДАНД

Душанбе, 30 июн.(АМИТ «Ховар», Марзия Саидова).- Вакилони Маҷлиси намояндагони Маҷлиси Олии Ҷумҳурии Тоҷикистон дар давоми се моҳи фаъолияти худ 1 қонуни конститутсионии Ҷумҳурии Тоҷикистон, 5 қонуни мукаммал, 9  тағйиру илова ба Кодексҳо, 17 тағйиру илова ба қонунҳо, 18 созишнома, конвенсия ва протколҳоро  кабул  ва тасдиқ карданд, гуфт зимни ҳисоботи худ Раиси Маҷлиси намояндагони Маҷлиси Олии ҷумҳурӣ Шукурҷон Зуҳуров дар ҷаласаи навбатии иҷлосияи якуми палатаи поёнии парлумони мамлакат 30 июн. Мавсуф аз фаъолияти палатаи поёнии парлумони Тоҷикистон дар ин давра натиҷагирӣ карда, зикр намуд, ки алҳол дар палатаи поёнии парлумони мамлакат намояндагони 5 ҳизби сиёсӣ фаъолият дошта, дар таҳия ва қабули қонунҳои ба манфиати ҷомеа ва рушди минбаъдаи иқтисодиёти кишвар нигаронида шуда, нақши муассир мегузоранд. Ш. Зуҳуров афзуд, ки дар Маҷлиси намояндагон 12 нафар зан-вакил фаъолият менамояд, ки он бозгӯи қавӣ гардидани нерӯи созандаи занон дар ҷомеаи Тоҷикистон  аст. Раиси палатаи поёнии парлумони мамлакат зикр кард, ки ҳар як вакили  Маҷлиси намояндагон бояд манфиатҳои  халқро тавассути  таҳия ва қабули  қонунҳои ҷавобгӯи талаботи замона ифода намояд. Инчунин, таъмини  суботи сиёсӣ ва амалӣ намудани се ҳадафи стратегӣ -таъмини истиқлолияти энергетикӣ, аз бунбасти коммуникатсонӣ раҳо додани кишвар ва ҳифзи амнияти озуқавории ҷомеа барои вакилони Маҷлиси намояндагон бояд нақшаи мукаммали фаъолият гардад.