ҲАФТ НАФАР БА ЗИЁРАТИ КАЪБА АЗ ҲИСОБИ САРВАРИ ДАВЛАТ

Душанбе, 16 июл. (АМИТ «Ховар», Дилшодаи Ҷонмард).- Президенти Ҷумҳурии Тоҷикистон Эмомалӣ Раҳмон дар ҷараёни сафари корӣ ба Вилояти Мухтори Кӯҳистони Бадахшон аз ҷумла ба шаҳру ноҳияҳои Ванҷ, Дарвоз, Рӯшон, Роштқалъа, Мурғоб, Шуғнон, Ишкошим, Хоруғ  ба роҳбарони баъзе вазорату идораҳои ҷумҳурӣ  дастуру супоришҳо дод. Ҷараёни иҷрои онҳо таҳти назорати бевоситаи  Сарвари давлат қарор дорад. Аз ҷумла ба Дастгоҳи иҷроияи Президент, Кумита оид ба корҳои дин, мақомоти иҷроияи ҳокимияти давлатии ВМКБ супориш дода шуд, ки ҳафт нафар   сокини Вилояти Мухтори Кӯҳистони Бадахшонро аз ҳисоби Сарвари давлат   барои зиёрати Каъба ва ба ҷо овардани маросими ҳаҷ  ба Арабистони Саудӣ фиристанд. Ҳамчунин, мувофиқи супориши Президенти Ҷумҳурӣ    барои сохтани осиёб ба талабаи синфи IX-и мактаби Вранги ноҳияи Ишкошим Фидоӣ Юсуфбек аз ҳисоби фонди эҳтиётии  Президенти Ҷумҳурӣ  маблағи зарурӣ  ҷудо карда мешавад. Тибқи супориши Президент  вазорати маориф ва шӯъбаи илм ва маорифи Дастгоҳи иҷроияи Президент    барои ба Донишкадаи забонҳои Тоҷикистон қабул кардан ва бо хобгоҳ таъмин намудани дастпарвари мактаби Вранги ноҳияи Ишкошим Сафияи Давлатбек бо ихтисоси забони англисӣ тадбирҳо меандешанд.