32 НАФАР ШАХСОНИ МАНСАБДОР ҶАРИМА КАРДА ШУДАНД

Душанбе, 19 июл. (АМИТ «Ховар», Лаззат Диловарзод).-  Саридораи назорати  давлатии бехатарии корҳо  дар саноат ва соҳаи кӯҳкории назди Ҳукумати ҶТ фаъолияти худро дар нимсолаи аввали соли ҷорӣ дар асоси Қонунҳои Ҷумҳурии Тоҷикистон ва Низомномаи Саридора мавриди амал қарор дод,- иброз дошт сардори саридораи мазкур Мурод Ҷумъаев. Дар Саридора 1515 корхона ва 13 ҳазору 964 иншоот ба қайд гирифта шудааст. Дар давраи ҳисоботӣ, дар корхонаҳои бақайдгирифташуда аз тарафи 8 нозири давлатӣ ва 3 нозири комплексии ВМКБ ва вилоятҳои Суғду Хатлон 27 назорати комплексӣ, 152 мақсаднок, 329 фаврӣ, ҷамъ 508 назорати техникӣ гузаронида шудааст. Барои надидани чораҳои лозимӣ оид ба пешгирӣ ва рух надодани ҳодисаҳои нохуш дар иншооти истеҳсолии хатарнок ба 42 нафар роҳбарони корхонаҳо нишондод оид ба қатъ гардонидани фаъолият пешкаш гардонида шуд. Дар рафти назорати техникӣ 32 нафар шахсони мансабдори корхонаҳои бақайдгирифташуда барои риоя накардани қоидаҳои бехатарии саноатӣ ба ҷавобгарии маъмурӣ кашида шуда, шахсони ба камбудиҳои ҷиддӣ роҳ дода, тибқи Кодекси ҳуқуквайронкунии маъмурӣ ба маблағи 14 ҳазору 560 сомонӣ ҷарима карда шуданд.