БОЗОМӮЗИИ МУТАХАССИСОНИ АВИАТСИЯИ ГРАЖДАНӢ

Душанбе, 15 июл. (АМИТ «Ховар», Лаззат Диловарзод).- Бино ба иттилои маркази матбуоти «Фурудгоҳи байналмилалии Душанбе» таваҷҷӯҳи роҳбарияти корхонаи мазкур баҳри омода намудани мутахассисони соҳаи авиатсияи гражданӣ сол то сол бештар мегардад. Ҳамасола барои бозомӯзӣ ва баланд бардоштани дараҷаи тахассусии кормандон даҳҳо мутахассисон барои бозомӯзӣ  ба шаҳрҳои Федератсияи Русия, Қазоқистон ва давлатҳои хориҷи дур  фиристода мешаванд. Ба майдони фурудгоҳ ҳамасола тамғаҳои   нави ҳавопаймоҳо ворид карда мешаванд. Ширкатҳои ҳавопаймоие, ки бо фурудгоҳи Душанбе ҳамкорӣ доранд, ҳавопаймоҳои навтарини «Эйрбас», «Боинг», «АН -120»- «Руслан» ва «Геркулес»-ро   дар ихтиёр доранд, ки истифодаи онҳо донишҳои мукаммал ва дараҷаи баланди тахассусиро тақозо менамоянд. Рӯзҳои наздик тибқи нақша, 12 нафар мутахассисони ҷавон  барои бозомӯзӣ ба маркази таълимии ширкати ҳавопаймоии «Сибир» фиристода мешаванд.