ДАР БИНОҲОИ БАЛАНДОШЁНАИ ШАҲР САНҶИШ ГУЗАРОНИДА МЕШАВАД

Душанбе, 28 июл.(АМИТ «Ховар», Марзия Саидова).-Масъалаҳои дастрасии аҳолии пойтахт бо оби нӯшокӣ, хизматрасонии  нақлиёти мусофиркашонии ҷамъиятӣ, таъмини бозори истеъмолӣ, танзими нархи маҳсулот дар бозорҳои шаҳр ва вазъи роҳҳои пойтахт дар ҷаласаи шаҳрдории Душанбе, ки дар ҳузури Раиси шаҳри Душанбе Маҳмадсаид Убайдуллоев баргузор шуд, баррасӣ гардиданд. Зимни натиҷагирӣ аз гузоришҳои масъулин Раиси шаҳр таваҷҷӯҳи  директори КВД «Обу корези Душанбе» Н. Хайруллоевро ба баланд бардоштани сатҳи хизматрасонӣ ба муштариён ва сифати оби истеъмолии ба аҳолӣ интиқолшаванда нигаронид. М. Убайдуллоев ба масъулини соҳа дастур дод, ки дар доираи талаботи қонунгузории ҷумҳурӣ оид ба ҳимояи  ҳуқуқи истеъмолкунандагон новобаста аз мавсими  сол хизматрасониро тақвият бахшида, ҷиҳати ҳаллу фасли муроҷиати шаҳрвандон фаъолияти гурӯҳҳои рафъи садамаро зери назорати қатъӣ қарор диҳанд. Ҳамзамон,  бо мақсади ташкили назорати ҷамъятӣ дар фаъолияти КВД «Обу корези Душанбе» муқаррар карда шуд, ки дар муддати ду ҳафта  комиссияи доимии Маҷлиси вакилони халқи шаҳри Душанбе  оид ба масъалаҳои меъморӣ,  шаҳрсозӣ, сохтмон ва ободонӣ баҳри ҳимояи ҳуқуқи истеъмолкунандагон санҷиши дахлдорро дар биноҳои истиқоматии баландошёнаи шаҳр вобаста ба ҳолати интиқоли оби нӯшокӣ анҷом дода, аз натиҷаи корҳои суратгирифта ба шаҳрдорӣ гузориш пешниҳод созанд.