ДАР ДУШАНБЕ ДАРИ КИТОБХОНАИ «ШАҲРИЁР» БОЗ ШУД

Душанбе, 13 июл.(АМИТ «Ховар», Марзия Саидова).-13 июл дар доираи сафари Роҳбари Дастгоҳи иҷроияи Президенти Ҷумҳурии Исломии Эрон Исфандиёр Раҳими Машоӣ ба Ҷумҳурии Тоҷикистон дар шаҳри Душанбе китобхонаи  ба номи Муҳаммадҳусайни Шаҳриёр дари худро ба рӯи хонандагон боз кард. Китобхонаи мазкур дар доираи тавсеаи ҳамкории илмию фарҳангии Тоҷикистону Эрон созмон дода шуда, дар он беш аз се ҳазор китобҳои гуногуни илмию бадеӣ, ки  дар Эрон бо ҳуруфи  форсӣ нашр гардидаанд,  нигоҳ дошта мешаванд Дар маросими ифтитоҳи он Роҳбари Дастгоҳи иҷроияи Президенти Эрон Исфандиёр Раҳими Машоӣ, Раиси Иттифоқи нависандагони Тоҷикистон Меҳмон Бахтӣ, Сафири Ҷумҳурии Исломии Эрон дар Ҷумҳурии Тоҷикистон Алиасғари Шеърдӯст ва дигар намояндагони илму фарҳанги Тоҷикистон сухан карда, ба фаъолият шурӯъ кардани китобхонаи «Шаҳриёр»—ро дар Душанбе фоли нек дар тақвияти робитаҳои илмию фарҳангӣ байни ду кишвари форсизабон арзёбӣ карданд.