ХАТАРИ ПАҲНШАВИИ ҲАШАРОТИ ЗАРАРРАСОН ДАР ХАТЛОН

Душанбе, 15 июл. (АМИТ «Ховар», Лаззат Диловарзод).- Бинобар тағйирёбии обу ҳавои нимаи дуюми моҳи июни соли ҷорӣ афзоиши ҳашароти зараррасон ба зироатҳои кишоварзӣ бештар мушоҳида гардид. Бо мақсади ҳифзи зироатҳои кишоварзӣ, боғу токзор  аз ҳашароти зараррасон аз тарафи Вазорати кишоварзӣ иловатан 1000 литр заҳрдоруи «Омайт» ва 500 литр «Малатион» ҷудо гардида, ба таври ройгон ба ноҳияҳои вилояти Хатлон фиристонида шуд. Бино ба гуфти сардори Муассисаи давлатии муҳофизати растаниҳо ва химикунонии кишоварзии вазорат Ю. Муродов, соли ҷорӣ барои мубориза бар зидди ҳашароти зараррасони кишоварзӣ ба вилоятиХатлон ба миқдори 9840 литр заҳрдору, 18 ҳазор литр сӯзишвории дизелӣ ва 140 адад дастгоҳҳои  дорупошаки дастӣ фиристода шуда буд. Дар кори муборизаи зидди ҳашароти зараррасон ҳамчунин 300 нафар коргарони  мавсимӣ аз 1-уми апрел то 1-уми июли соли ҷорӣ ҷалб карда шуданд.