ХАТСАЙРҲОИ НАВ БА СӮИ «ҶАЗИРА» ҲАРАКАТ МЕКУНАНД

Душанбе, 28 июл.(АМИТ «Ховар», Марзия Саидова).- «Аз 1 сентябри соли 2010 дар пойтахт як чанд хатсайри нави нақлиёти ҷамъиятӣ ба роҳ монда мешавад», гуфт зимни сӯҳбат ба хабарнигори АМИТ «Ховар» Директори муассисаи давлатии коммуналии «Душанбенақлиётхадамотрасон» Абдуҳомид Шералиев. Мавсуф афзуд, ки бо  дархости роҳбарияти Донишгоҳи миллии Тоҷикистон чор хатсайри нав  барои донишҷӯёни Донишгоҳи мазкур ба шаҳраки донишҷӯён,  воқеъ дар маҳаллаи Буни Ҳисорак, ки дар байни донишҷӯён бо номи Ҷазира маъмул аст, ифтитоҳ карда мешавад. Нақлиёте, ки дар ин хатсайрҳо  ба ҳаракат медароянд,  аз чор қисмати шаҳр — маҳали бозори Корвон, маҳаллаи Зарафшон, Политехникум ва Обшорон  донишҷӯёнро дар соатҳои муайян ба шаҳраки донишҷӯён мерасонанд.