КАФОЛАТИ «ФОКУС» ДАР БЕХАТАРИИ ҲАЁТИ ШАҲРВАНДОН

Душанбе, 13 июл. (АМИТ «Ховар», Лаззат Диловарзод).- Дар Ҷумҳурии Тоҷикистон нисбати созмони байналмилалии «Фокус» эҳтирому эътимоди мардум зиёд аст. Тавассути ин созмон дар даҳҳо деҳаҳои шаҳру навоҳии ҷумҳурӣ мардум бо оби софи ошомиданӣ таъмин гардидаанд. Соли ҷорӣ тавассути ин созмон дар 81 деҳаҳои дурдасти Вилояти Мухтори Кӯҳистони Бадахшон дастгоҳҳои алоқаи «Кодан» насб када шудааст. Ҳар яке аз ин  дастгоҳҳо  16 ҳазор  сомонӣ арзиш дорад ва пеш аз насб кардани он дар манзилҳои истиқоматӣ ба ҳар як аъзои оила тарзи истифодаи он омӯзонида шуда,   ҳар як аъзои оила  бо ин дастгоҳи мухобиротӣ таъмин мегардад. Дар ҳолати рух додани ҳодисаҳои табиӣ: обхезӣ, сӯхтор. заминҷунбӣ, ярч, тарма, сел ва дигар ҳодисаҳо шаҳрвандони омӯзонидашуда тавассути ин дастгоҳ ба кормандони ҳолатҳои фавқулоддаи шаҳру навоҳӣ  хабар медиҳанд. Дастгоҳи алоқаи радиоии «Кодан» баъди ба истифода додан ба мувозинаи ситоди ҳолатҳои фавқулоддаи шаҳру ноҳияҳои ҷумҳурӣ супорида мешавад. Бино ба гуфти танзимгари ин дастгоҳ А. Ғиёсов, дастгоҳи мавҷи радиоидоштаи «Кодан» бо мақсади кам кардани осебпазирии аҳолӣ аз ҳодисаҳои табиӣ ба мардум  хизмат мерасонад.