КОНСЕПСИЯИ РУШДИ СОҲАИ СОХТМОН ДАР КӮЛОБ

Кӯлоб, 27 июл. (АМИТ «Ховар», Сулаймон Холов). — Таи солҳои  охир мақомоти маҳалӣ ва масъулини бахши сохтмон ва меъмории шаҳри Кӯлоб ба соҳаи сохтмон таваҷҷӯҳи хоса зоҳир намуда, ин ҷо аз ҷониби ширкатҳои сохтмонии шаҳру ноҳия ва вилояту ҷумҳурӣ бисёр биноҳои зебою барҳаво ва замонавӣ мавриди баҳрабардорӣ қарор дода шудаанд. Айни замон дар шаҳр сохтмони як қатор иншооти ниёзи мардум идома дорад ва  бо мақсади санҷиш аз ҷараёни корҳои сохтмонӣ дар иншооти мазкур ва ҳамчунин сатҳи иҷрои қонуни Ҷумҳурии Тоҷикистон дар бораи «Консепсияи рушди соҳаи сохтмон дар шаҳри Кӯлоб» комиссияи депутатҳои вилояти Хатлон аз рафти сохтмонҳо ва сифати корҳои иҷрошуда санҷиш гузарониданд. Ҳайъати комиссия диққати асосиро ба иншооте равона карданд, ки сохтмони онҳо аз буҷаи ҷумҳуриявӣ, вилоятӣ ва шаҳри маблағгузорӣ карда мешаванд. Ҳангоми санҷиш таъкид гардид, ки дар сохтмони биноҳо мебояд усулҳои муосири меъморӣ ва масолеҳу таҷҳизоти камхарҷу дастрас истифода бурда шавад.