МАҚБАРАИ ХОҶА МАШҲАД АЗ НАВ БАРҚАРОР ГАРДИД

Душанбе, 1 июл. (АМИТ «Ховар», Лутфия Эшонқулова).-6-уми июли соли равон пас аз тармиму азнавбарқарсозӣ маросими кушодашавии мақбараи Хоҷа Машҳад дар ноҳияи Шаҳритус доир мегардад. Бояд гуфт барои ин иқдом Вазорати фарҳанги Ҷумҳурии Тоҷикистон бо Сафоратхонаи Амрико дар Тоҷикистон соли 2005 шартнома баста буданд, ки маблағгузории мақбараи мазкур аз ҷониби ин сафорат сурат гирифтааст. Мақбараи Хоҷа Машҳад аз асрҳои 10-11 боқӣ монда, яке аз нодиртарин ёдгории таърихӣ ба шумор меравад.   Барои азнавбарқароркунии мақбара Вазорати фарҳанг Раҳматҷон Саломовро ҳамчун меъмори варзида ва чирадаст ба кор ҷалб намуд, ки дар давоми панҷ сол бо маблағи 120 ҳазор доллари амрикоӣ аз нав тармим гардид. Ёдрас мешавем, ки  Мақбараи Хоҷа Машҳад низ ҳамчун ёдгории таърихии нодир барои дар руйхати Мероси фарҳангии ЮНЕСКО пешниҳод шудааст. Дар ин бора ба АМИТ «Ховар» аз маркази матбуоти Вазорати фарҳанг хабар доданд.