МАШҒУЛИЯТИ АМАЛӢ БАРОИ ТАЪЛИМИ КАЛОНСОЛОН

Душанбе, 2 июл.(АМИТ «Ховар», Лаззат Диловарзод).- Аз 21 июн то          2-юми  июли соли ҷорӣ дар Вазорати меҳнат ва ҳифзи иҷтимоии аҳолии ҷумҳурӣ дар ҳамкорӣ бо Маркази байналмилалии мусоидат ба рушд ва такмили ихтисос «In Went»-и Ҳукумати Ҷумҳурии Федералии Олмон дар мавзӯи: «Консепсияи гузаронидан ва таъмини сифати курсҳои такмили ихтисос» машғулияти амалӣ   гузаронда шуд. Мақсад аз баргузории машғулияти амалӣ,  баланд бардоштани малакаҳои касбии омӯзгорони соҳаи таълими касбии калонсолон арзёбӣ гардид. Бо мақсади баргузор кардани машғулияти амалӣ тренери бомаҳорат доктор Ҳабибураҳмон Ҳабиб аз давлати Олмон даъват карда шуда буд. Дар кори баргузории машғулияти амалӣ зиёда аз 23 нафар омӯзгорон- мултипликаторон аз тамоми минтақаҳои ҷумҳурӣ иштирок варзиданд. Бино ба гуфти мудири бахши таълими  калонсолони Вазорати меҳнат ва ҳифзи иҷтимоии аҳолӣ Саломатшо Имроншоев ин ҳамкорӣ дар асоси Протоколи ҳусни тафоҳум байни вазорати мазкур  ва Маркази байналмилалии мусоидат ба рушд ва такмили ихтисос «In went»- и Ҳукумати Ҷумҳурии Федеролии Олмон ба роҳ монда шудааст.