МУҲОҶИРАТИ ДОХИЛӢ БОИСИ ҲИФЗИ ҲАЁТ

Душанбе, 22 июл. (АМИТ «Ховар», Лаззат Диловарзод).- Тибқи ҷадвали тасдиқгардидаи Вазорати меҳнат ва ҳифзи иҷтимоии аҳолӣ, дар давоми соли ҷорӣ беш аз 1500 оила ба минтақаҳои гуногуни ҷумҳурӣ кӯчонида мешаванд. Танҳо дар давоми нимсолаи аввали соли 2010 450 оила аз минтақаи обанбори ояндаи нерӯгоҳи барқи обии «Роғун» ба ҷойҳои дигари барои аҳолӣ мувофиқ кӯчонида шудаанд. Бино ба маълумоти Вазорати  меҳнат ва ҳифзи иҷтимоии аҳолӣ, соли ҷорӣ дар миқёси ҷумҳурӣ 1102 оила ба таври ихтиёрӣ ба минтақаҳои дигари ҷумҳурӣ мекӯчанд. Ба иттилои ҳамин манбаъ, 11 оила аз ВМКБ, 165 оила аз вилояти Хатлон, 657 оила аз вилояти Суғд ва 269 оила аз ноҳияҳои тобеи ҷумҳурӣ   ба ҷойҳои  бехавфтари маҳали зист ва ё ба минтақаҳои  дигари вилоятҳои  Хатлону Суғд кӯчонида мешаванд. Вазорати молияи ҷумҳурӣ дар соли ҷорӣ  барои муҳоҷирати дохилӣ  1 млн. 653 ҳазор сомонӣ қарзҳои имтиёзнок ҷудо менамояд.