МУЛОҚОТИ Э. РАҲМОН БО САФИРИ ҲИНД

Душанбе,  7 июл. (АМИТ «Ховар»,  Дилшодаи  Ҷонмард). —  Президенти  Ҷумҳурии  Тоҷикистон  Эмомалӣ  Раҳмон  субҳи   имрӯз  бо    Сафири фавқулодда ва мухтори Ҷумҳурии Ҳиндустон  дар Тоҷикистон  Амар Сингҳ, ки мӯҳлати сафириаш дар кишвари мо ба охир расидааст мулоқот  кард.             Амар Сингҳ баъди  анҷоми мулоқоташ  бо  Сарвари  давлат   зимни  сӯҳбати  мухтасар  бо  хабарнигорон  дар  бораи  натиҷаҳои он  маълумот дод. Ӯ иброз дошт, ки  ин мулоқоти ман мулоқоти   хайрбодӣ буд, ки бинобар ба итмом расидани муҳлати адои вазифаи ман ба сифати сафири фавқкуллода ва мухтор сурат гирифт.             Дар рафти мулоқот мо ҳамаи дастовардҳоямонро  дар давоми се соли охир   мавриди муҳокима қарор додем ва мулоҳизаҳои худро роҷеъ ба ҳамкориҳои боз ҳам бештари  кишварҳоямон иброз доштем. Бояд гуфт, ки  ҳамкории  кишварҳои мо дар самти ҳамлу нақли мол ва коммуникатсия бисёр баланд арзёбӣ карда шуд. Зимни суҳбат инчунин вазъияти  Афғонистон ва дигар кишварҳои минтақа мавриди баррасӣ қарор гирифтанд.          Сафир афзуд, ки роҷеъ ба  фаъолияти сармоягузории Ҷумҳурии Ҳиндустон  ба фаъолияти ширкатҳои хусусӣ иттилоъ додааст. Амар Сингҳ ҳамчунин иброз дошт, ки натиҷаҳои сафари расмии Президенти Ҷумҳурии Ҳиндустонро ба Тоҷикистон баррасӣ карда шуданд. Таъкид гардид, ки  ин аввалин сафари Президенти Ҷумҳурии Ҳиндустон  ба кишварҳои Осиёи Марказӣ буд ва ба муносибатҳои ҳамаҷонибаи Ҳиндустону   Тоҷикистон  такони тоза бахшид.