МУЛОҚОТИ Э. РАҲМОН БО САЛИМ МАНДВИВАЛЛА

19 июли соли 2010 Президенти Ҷумҳурии Тоҷикистон Эмомалӣ Раҳмон  Вазири давлатӣ-раиси Кумитаи сармоягузории Ҷумҳурии Исломии Покистон Салим Мандвивалларо ба ҳузур пазируфт. Дар мулоқот масоили ҳамкории ду кишвар баррасӣ шуд. «Густариш додани муносиботи судманд бо Покистон яке аз самтҳои муҳими сиёсати хориҷии Тоҷикистон дар қитъаи Осиё аст», — изҳор дошт зимни сўҳбат Сарвари давлат Эмомалӣ Раҳмон. Ифтитоҳи хатсайри мустақими парвоз миёни шаҳрҳои Душанбею Исломобод баёнгари хислати амалии муносибатҳои ҳамкории Тоҷикистону Покистон арзёбӣ гардид. Аз баргузории мулоқоти соҳибкорону тоҷирони ду кишвар дар шаҳри Душанбе бо иштироки беш аз 40 нафар аз Покистон изҳори қаноатмандӣ карда шуд. Ҷоннок намудани кори Комиссияи муштараки байниҳукуматӣ, татбиқи саривақтӣ ва босамари санадҳои дуҷониба, пеш аз ҳама дар соҳаҳои иқтисод ва савдо, сармоягузорӣ, илму техника ва фарҳанг ва таҳияи Барномаи мушаххаси дарозмуддати ҳамкорӣ зарур шумурда шуд. Таъкид гардид, ки барои густариши тиҷорати минтақавӣ зарурати таҳия ва фаъол намудани созишномаи ҳамкории сеҷонибаи тиҷоратӣ миёни Тоҷикистону Покистон ва Афғонистон ба миён омадааст. Ҳарду ҷониб омодагии худро ҳамчунин оид ба рушди ҳамкориҳо дар соҳаҳои бунёдии иқтисодиёт, аз ҷумла энергетика, саноат ва нақлиёту коммуникатсия ва бунёди корхонаҳои муштараки саноатӣ дар Тоҷикистон таъкид намуданд. Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.