МУТАХАССИСОН БА ЁРИИ ДЕҲҚОНОН РАФТАНД

Душанбе, 9 июл. (АМИТ «Ховар», Лаззат Диловарзод).- Бо мақсади беталаф ҷамъоварӣ намудани «Ҳосил — 2010» ва бо  сифати баланд гузаронидани кишти такрории зироатҳо бо дастури вазири кишоварзӣ Қосим Қосимов гурӯҳи корӣ таҳти роҳбарии муовинони вазири кишоварзӣ, мутахассисони вазорат ва олимони Академияи илмҳои кишоварзии Тоҷикистон, роҳбарони зерсохторҳои вазорат барои кӯмаки амалию методӣ дар ҷамъоварии ҳосили ғалладона ба шаҳру навоҳии ҷумҳурӣ фиристода шуданд.  Гурӯҳи корӣ зимни сафари хизматӣ рафти ҷамъоварии ғалла, кишти такрорӣ ва таъмини тухми зироатҳоро дар хоҷагиҳои деҳқонӣ (фермерӣ) омӯхта ба онҳо кӯмакхои методӣ мерасонад. Вазифаи имрӯзаи кишоварзон беталаф ҷамъоварӣ намудани ғалладона аз  масоҳати 298 ҳазору 685 гектар мебошад.  То 5 –уми июл майдони 106 ҳазору 373 гектар, ки 35,6 фоизи умумии киштро ташкил медиҳад, ҷамъоварӣ гардидааст.