НАТИҶАИ МУБОРИЗА НОМАЪЛУМ АСТ

Душанбе, 28 июл.(АМИТ «Ховар»,Лаззат Диловарзод).- Тибқи маълумоти Корхонаи ҷумҳуриявии воҳиди давлатии  «Мубориза бар зидди малах», имрӯзҳо дар хоҷагиҳои кишоварзии ҷумҳурӣ мубориза бар зидди малах ва дигар ҳашароти зараррасон идома дорад. Бино ба иттилои ҳамин манбаъ, паҳншавии малах то 26 –уми июли соли ҷорӣ дар майдони 101 ҳазору 730 гектар ба қайд гирифта шудааст, ки масоҳати 78 ҳазору 863 гектари он тавассути моддаҳои кимиёвӣ ва  бо усули   ба хандақҳо ронда гӯронидани он  тоза карда шудааст. Бо вуҷуди сафарбарии умумии аҳолӣ дар мубориза бар зидди малах, ҳанӯз дар масоҳати 23 ҳазор гектар малах ва баъзе аз ҳашароти ба зироату пахта зараровар, аз қабили малах ва тортанаккана  пурра нест карда нашудааст, ки ин боиси ташвиши зироаткорону пахтакорон гардидааст. Алҳол дар 10 ноҳияи вилояти Хатлон,  5 ноҳияи вилояти Суғд ва 4 ноҳияи тобеи ҷумҳурӣ хавфи таҳдиди малах  ба зироат ва пахта аз байн нарафтааст. Бо вуҷуди баъзе сабабҳои субъективӣ, имрӯзҳо аз 590 нафар қувваи корӣ, 22 адад трактори дорупошӣ ва 450 дорупошаки дастӣ дар мубориза бар зидди малах истифода карда мешавад, вале ҳанӯз маълум нест, ки ҳашароти зараррасон бо ин ҳама заҳмати кашида  пурра нест   мешавад ё не?