НАЗДИК ШУДАН БА НИШОНДИҲАНДАҲОИ ПЕШАЗБӮҲРОНӢ

Душанбе, 29 июл. (АМИТ «Ховар», Лаззат Диловарзод).- Дар нишасти матбуотие, ки ба ҷамъбасти нимсолаи рушди иҷтимоию иқтисодии ҷумҳурӣ  дар Вазорати рушди иқтисод ва савдо бахшида шуд, вазири рушди иқтисод Фаррух Ҳамралиев ба хабарнигорони дохилу хориҷи кишвар иброз намуд, ки дар давоми моҳҳои январ – июни соли 2010 суръати афзоиши маҷмӯи маҳсулоти дохилии Ҷумҳурии Тоҷикистон 7,4 фоиз боло рафтааст. Ин болоравӣ давра ба давра  ба нишондиҳандаҳои пешазбӯҳронӣ наздик мешавад. — Ҳаҷми номиналии маҷмӯи маҳсулоти дохилӣ аз рӯи нархҳои ҷорӣ 9 млрд. 622 млн. сомонӣ ва индекс – дефлятори нархҳо 114,9 фоизро ташкил додааст,- гуфт вазир.  Бино ба гуфти вазир, бо мақсади рушди иҷтимоӣ — иқтисодии минтақаҳои ҷумҳурӣ аз ҷониби Ҳукумат   ҳоло 9 барномаи рушди минтақаҳои ҷумҳурӣ қабул ва амалӣ гардида истодааст. Ҳамзамон бо мақсади рушди   минтакаҳо аз ҷониби Вазорати рушди иқтисод ва савдо дар ҳамкорӣ бо мақомоти иҷроияи ҳокимияти давлатии  маҳаллии шаҳру ноҳияҳо дар доираи лоиҳаи Барномаи Рушди  СММ 15 барномаи миёнамӯҳлати рушди ноҳиявии минтақа таҳия мегардад. Сипас, баҳсҳои доманадор миёни рӯзноманигорон ва мутасаддиёни вазорат доир ба бисёр масъалаҳои доғи рӯз сурат гирифт, ки ислоҳи  онҳор зарур шуморида шуд.