ОЁ ПЕШНИҲОДИ РУСТАМ НАЗАРОВ МЕГУЗАРАД?

Душанбе, 10 июл. (АМИТ «Ховар», Лаззат Диловарзод).- Раиси Агентии назорати маводи нашъаовари  назди Президенти Ҷумҳурии Тоҷикистон Рустам Назаров зимни суханронӣ дар  ҳамоиши байналмилалӣ дар шаҳри Вена масъалаи нобуд сохтани маводи мухаддирро пешниҳод намуд. Номбурда дар ин ҳамоиш иброз доштааст, ки олимони Тоҷикистону Ӯзбекистон дар ҳамкорӣ бо СММ усули безарари биологиеро пайдо кардаанд, ки  маҳви киштзорҳои кӯкнорро дар Афғонистон бе ҳеҷ гуна мубориза,  танҳо бо роҳи илмӣ аз байн мебаранд. Ба гуфти Рустам Назаров, олимони тоҷику ӯзбек занбурӯғҳои маҳвкунандаи кӯкнорро, ки барои одамон безарар мебошанд офаридаанд. Ин занбурӯғҳо растании кӯкнорро   ба касалӣ гирифтор намуда  нобуд месозанд.   Зарур аст, ки   бо  ин  усул тамоми киштзорҳои кӯкнор дар давлати Афғонистон, ки калонтарин  тавлидкунандаи маводи мухаддир дар ҷаҳон дониста мешавад аз байн бурда шавад.