ПОЙТАХТИ НАВИ ҚАЗОҚИСТОН 12 СОЛА ШУД

Душанбе,  2 июл. (АМИТ «Ховар», Людмила  Дубинина). —  Мардуми  Қазоқистон  6  июл   12  солагии  бунёди  пойтахти  нави  мамлакат  — шаҳри  Остонаро  ботантана  ҷашн  мегирад.  Ба  ин  муносибат   сафоратхонаи  Қазоқистон  дар  Тоҷикистон   зиёфати расмӣ  ташкил  менамояд. Пойтахти   нави  Қазоқистон —  шаҳри  Остона  дар  қисмати  шимолии  мамлакат  ҷойгир  шудааст.  Пойтахти  мамлакат  соли   1997  бо  қарори  Президенти  Қазоқистон  Нурсултон  Назарбоев  аз Алмаато  ба  шаҳри Оқмола  кӯчонида шуд. Зеро  ин  шаҳр  дар  маркази  Қазоқистон   ва  қитъаи  Евразия воқеъ  буда,  дорои  системаи  мукаммали  нақлиётӣ  ва  алоқа  буд.  Инчунин   қабули  қарори  мазкур  ҳадафи   геополитикӣ  дошт. Имрӯз   пойтахти  нави  Қазоқистон  ба  шаҳри  ободу  зебои  замонвӣ  табдил  ёфтааст. Дар  сохтмони он  зиёда  аз 70  шаҳри  мамлакат  саҳм  гузошт.  Инчунин дар  обод  гардидани  пойтахти нави  Қазоқистон  саҳми  ширкатҳои  сохтмонии  Туркия,  Италия, Фаронса ва  Швейтсария  калон  аст. Ҳоло  ҳар  сол  дар  ин ҷо аз  60  то 100 корхонаю  муассиса ва  ташкилоти  хурду  калон  ба  истифода дода  мешавад. Мухбири  АМИТ «Ховар»  зикр  мекунад, ки Тоҷикистону  Қазоқистон   муносибатҳои   самимонаю   дӯстона  доранд,  ҳар  ду  кишвар  дар  соҳаҳои  сиёсию  иқтисодӣ,  тиҷоратӣ,  илмию техникӣ ва  фарҳангӣ  самарабахш  ҳамкорӣ  мекунанд. Сафоратхонаи  Қазоқистон  дар  Тоҷикистон   4  октябри соли 2000  ба  фаъолият  шурӯъ  намуд.  Муносибатҳо  ва  ҳамкории ҳар  ду  кишвар  дар  рӯҳияи  ба  назар  гирифтани  манфиатҳои  ҳамдигар  ва  шарокати  боэътимод  ба  роҳ  монда шуда,  сол то  сол  бештар  густариш  меёбанд.