РУШДИ ТЕХНОЛОГИЯИ МУОСИРИ ИТТИЛООТӢ ДАР КИТОБХОНАҲО

Душанбе, 28 июл. (АМИТ «Ховар», Лутфия Эшонқулова).- Бахшида ба соли маориф ва фарҳанги техникӣ дар Китобхонаи миллии Тоҷикистон ба номи А. Фирдавсӣ конфронси илмӣ-амалии «Китобхонаҳо дар шароити рушди технологияи муосири иттилоотӣ» доир шуд. Дар кори конфронс намояндагони китобхонаҳои кишвар ва хориҷ, коршиносон, кормандони китобхонаҳо, донишҷӯён ширкат варзиданд. Аз ҷумла, директори Китобхонаи марказии илмии Академияи илмҳои Тоҷикистон – Алла Аслиддинова дар мавзӯи «Китобхонаи рақамии ҷаҳонӣ ва китобхонахои Тоҷикистон», намояндаи Китобхонаи Конгресси ИМА дар Покистон ва Ҳиндустон – Карол Мичелл дар мавзӯи «Китобхонаи Конгресси ИМА: дастовардҳо ва дурнамои фаъолият», директори Китобхонаи миллӣ Тоҷикистон ба номи А. Фирдавсӣ Шариф Тошев дар мавзӯи «Фонди электронии Китобхонаи миллии ҶТ ва дастёбии он» баромад карданд.     Дар ҷамъбаст намоиши китобҳо таҳти унвони «Китоб рукни муҳими тамаддуни башарӣ» баргузор гардида, китобҳои тозанашр ва аз фонди китобхона китобҳои гуногун пешкаши иштирокчиёни конфронс гардид.