САТҲИ КАМ БИЗОАТӢ БОЗ ПАСТТАР МЕШАВАД

Душанбе, 16 июл. (АМИТ «Ховар», Лаззат Диловарзод).- Моҳи июл боз як қадами устувор дар коҳиши камбизоатии мардуми Тоҷикистон дониста мешавад. Дар ин  моҳ боз як созишномаи кӯмак баҳри коҳиши камбизоатӣ дар Тоҷикистон миёни вазири молияи ҷумҳурӣ Сафарали Наҷмуддинов ва роҳбари минтақавии Бонки Ҷаҳонӣ Мото Конишӣ ба имзо расид,-иброз дошт коршиноси масоили иқтисодӣ Ҳоҷимуҳаммад Умаров  ба мухбири АМИТ «Ховар». Бино ба гуфти коршинос Ҳ.Умаров, тибқи созишномаи  мазкур, агар  25,4 млн. доллари амрикоӣ ҳамчун маблағи грантӣ барои идомаи ислоҳоти давлатӣ дар роҳи паст кардани сатҳи камбизоатӣ ба буҷаи ҷумҳурӣ ворид  гардад, бо боварӣ гуфтан мумкин аст, ки ислоҳоти давлатӣ дар самти қабул шудааш амалӣ гардида, сатҳи камбизоатӣ дар кишвар чанд фоиз поён хоҳад рафт. Боис ба ёдоварист, ки ин чорумин маблағи грантӣ ё кӯмаки бебозгашти Бонки Ҷаҳонӣ  барои дастгирии аҳолии камбизоат дар Ҷумҳурии Тоҷикистон аст.