ШАРТНОМАИ ҲАМКОРӢ БАЙНИ ДУ ШИРКАТ

Душанбе, 29 июл.(АМИТ « Ховар», Мавзуна Бойева).- Давлатҳои Осиёи Марказӣ, аз ҷумла Тоҷикистон аз сабаби ҷойгир будан дар минтақаи ҷуғрофӣ ва серзилзила нисбат ба дигар минтақаҳо аз офати табиӣ зиёдтар зарар мебинанд. Муҳимияти ин масъала дар ҷамъомадҳои байналхалқӣ ва давлатӣ борҳо таъкид шудааст. Ширкати «Вавилон-мобайл» аз аввали фаъолияташ инҷониб дар лоиҳаҳои гуногуни сатҳи давлатӣ фаъолона ширкат меварзад. Тӯли якчанд соли охир ширкат бо ташкилоти «Миссияи Шарқ» ҳамкории зич дорад. 22 июни соли 2010 аз ҷониби роҳбарон шартномаи навбатӣ дар бораи ҳамкории байни ширкатҳои «Миссияи Шарқ» ва ҶСП «Вавилон-мобайл» аз рӯи Барномаи «Паст кардани хавфи офатҳои табиӣ» ба имзо расид. Ҳамкории мазкур дар таҷдиди лоиҳаи «Ҷамъияти шаҳрвандӣ барои паст кардани сатҳи офатҳои табиӣ», ки аз ҷониби Раёсати кӯмакҳои башардӯстонаи Комиссияи Аврупоӣ маблағгузорӣ мешавад, нақши ҳалкунанда мебозад. Ширкати «Вавилон-Мобайл» ҳамчун назоратчии бузургтарин алоқаи мобилӣ барои дар амал татбиқ намудани лоиҳаи мазкур кӯмаки ҳамаҷониба мерасонад.