СОХТМОНИ МАНЗИЛ ДАР ПОЙТАХТ МЕАФЗОЯД, ВАЛЕ ЭҲТИЁҶОТИ МАРДУМ ҚОНЕЪ НАМЕГАРДАД

Душанбе, 30 июл.(АМИТ «Ховар», Марзия Саидова).-Дар нимсолаи аввали соли 2010-ум дар пойтахт дар масоҳати 15 ҳазору 386 метри мураббаъ манзил сохта ба истифода дода шуд, ки нисбат ба ҳамин давраи соли гузашта 2 ҳазору 763 метри мураббаъ зиёд аст. Ин матлаб зимни нишасти матбуотӣ бо иштироки роҳбарону намояндагони  сохторҳои гуногуни  пойтахт  ба хабарнигорон пешниҳод  гардид. Мавриди зикр аст, ки беш аз 12 ҳазор метри мураббаъи манзилҳо  аз ҳисоби  маблағҳои  аҳолӣ ва 2, 8  ҳазор метри мураббаъ тавассути ҷамъиятҳои масъулияташон маҳдуд ва аз ҳисоби соҳибкорон бунёд шудааст. Дар робита ба вусъат ёфтани корҳои сохтмонӣ дар пойтахт  шумораи кормандоне, ки дар бахши сохтмон фаъолият доранд,  беш аз пеш меафзояд. Алҳол  теъдоди сохтмончиёне, ки дар иншооти сохтмонии пойтахт ба кор машғул мебошанд наздик ба 7 ҳазор буда, музди миёнаи меҳнати онҳо  беш аз 1000 сомониро ташкил медиҳад.           Бо вуҷуди афзоиши сохтмони манзил дар пойтахт ҳанӯз ҳам масъалаи бо манзил таъмин кардани аҳолии шаҳр,  чун масъалаи мубрами рӯз боқӣ мемонад.