СОХТМОНИ НЕРӮГОҲИ «ШИРҒ — 2» ДАР ДАРВОЗ

Душанбе, 9 июл. (АМИТ «Ховар», Лаззат Диловарзод).- Сохта ба истифода дода шудани ҳар як иншооти нав, ки ба беҳшавии ҳаёти моддию маишии мардуми  ноҳияи Дарвоз оварда расонидааст, шукрона аз самари истиқлол аст,-мегӯяд профессор – табиб ва гиёҳшиноси  тоҷик Юсуф Нуралиев. Дар давоми сею ним соли охир ба истифода додани 54 адад иншооти хурду бузург далели ин гуфтаҳост. Соли ҷорӣ дар паҳлӯи нерӯгоҳи барқи обии «Ширғ -1» хишти нави сохтмони нерӯгоҳи барқи обии «Ширғ -2» бо иқтидори 594 кВт/ соат  гузошта шуд, ки он  то ҷашни Наврӯзи соли 2011 сохта ба истифода дода мешавад. Боиси тазаккур аст, ки соли 2008  сохтмони нерӯгоҳи «Ширғ-1» оғоз ёфт ва моҳи октябри соли 2009 ин нерӯгоҳ бо иқтидори 1 ҳазору 260 кВт/соат ба истифода дода шуд, ки  дар чор фасли сол сокинони ноҳияи Дарвозро бо барқи доимӣ таъмин менамояд. Дар сурати ба кор даромадани нерӯгоҳи нав дар деҳаи Ширғ як қисми аҳолии ноҳияи Ванҷ низ бо барқи доимӣ таъмин мегардад.